යුද ගැටුම් හේතුවෙන් ලොව පුරා ළමුන්ට සිදුව ඇති බලපෑම 2024 දී ඉතා අවදානම් තත්ත්වයක

ලොව පුරා ළමුන් වෙත යුද ගැටුම් හේතුවෙන් සිදුව ඇති අහිතකර බලපෑම 2024 වසරේදී විනාශකාරී මට්ටමක් දක්වා ළඟා වී ඇති බවත්, එය වාර්තාගත ලෙස ඉතා අවදානම් තත්ත්වයක පවතින බවත් එක්සත් ජාතීන්ගේ ළමා අරමුදල ඊයේ (28) ප්‍රකාශ කළේය.

එක්සත් ජාතීන්ගේ ළමා අරමුදලේ ඇස්තමේන්තු අනුව අන් කවරදාටත් වඩා එම වසරේ දී ළමුන්, ගැටුම් කලාපයන්හි ජීවත් වීම හේතුවෙන් හෝ ගැටුම් හා ප්‍රචණ්ඩත්වයට මුහුණ දීමට සිදු වීම හේතුවෙන් බලහත්කාරයෙන් අවතැන් ව ඇත. ඒ අනුව 2024 වසරේ දී ගැටුම් හේතුවෙන් තම අයිතිවාසිකම් උල්ලංඝනය වූ ළමුන් සංඛ්‍යාව වාර්තාගත මට්ටමක් කරා ළඟා වී තිබේ. “අයිතිවාසිකම් උල්ලංඝනය” යන්නට ගැටුම් හේතුවෙන් මරණය හෝ තුවාල සිදු වීම, පාසල් අධ්‍යාපනය අහිමි වීම සහ දරුණු මන්දපෝෂණය ද ඇතුළත් වේ. මෙම සංඛ්‍යාලේඛනයේ දත්ත ඉදිරියේදී තවදුරටත් සංශෝධනය වනු ඇතැයි අපේක්ෂා කරන බව එක්සත් ජාතීන්ගේ ළමා අරමුදල පවසයි.